[食譜]玉子燒

是咁的, 搵左好耐都搵唔到細支的味醂, 一支味醂用的機會又唔係咁多, 每次用的份量亦唔係太多, 如果買一大支番黎大概用到2046年都用唔完...



不過上星期係旺角的一田搵到一支細支裝的, 正好俾我呢個小毒男用!

由於今日的玉子燒只係大阪燒的配菜, 圖片中會有大阪燒出現, 請勿見怪!
廢話少講, 立即進入正題

材料:
雞蛋 4隻
味醂 1茶匙
糖 2 茶匙

另可加上自己喜歡的調味料*


步驟:
1) 請將4隻蛋同其他調味料攪勻

2) 屋企有平底鑊的可以用平底鑊, 無的話, 用最細的鑊一樣得, 用少少油抹勻, 油熱了後就將火收到最細

3) 4隻蛋的話, 蛋漿預計分為5份, 將第1份的蛋液落鑊, 蛋皮形成後捲起 (因為薄的蛋皮好易會燶, 所以要細火! 但係細火得濟, 蛋皮熟得會比較慢, 唔想整穿的話要俾少少耐性喔!)

4) 捲好後將蛋卷放鑊邊, 再落蛋液

5) 如上圖一樣, 蛋皮成形後用同樣的方法卷, 重覆上面的步驟直至用完所有蛋漿

6) 完成後的玉子燒, 會有一定的厚度

7) 切開後就可以上碟了~~~~

* PS, 因為有關玉子燒的調味料有好多講法, 我唔一一係度詳述了, 日本家庭會用鰹魚粉, 高湯帶出咸味, 但係呢類的調味料香港較難搵到, 簡單D的話, 落1/4茶匙的鹽都可以! 不過, 因為玉子燒唔係一樣有特定味道的食物, 較不喜歡甜的, 可以減少糖同味醂的份量, 加入較多的鹽, 總之可按自己喜歡的份量調味!很自由的!!!

就這樣, 希望大家喜歡!