[食譜]芝士豬肉意大利雲吞(Tortellini)

本來星期日的晚上, 係預左同母親大人外出用膳的, 誰不知, 1900先收到電話放我飛機, 於是我就跑落街買材料煮Tortellini。

由於時間同人數關係, 超級市場買唔到菠菜, 簡簡單單地用芝士加豬肉就算....

加上已經開始入夜, 我的目標只係要快!快D煮完有得食就好啦....

而事實上, 我唔係用左好多時間姐, 買完野7點半, 8點9我已經食緊, 嘿嘿!

廢話少講, 去片

材料: (2人前[大食] [約20隻左右])

麵皮部份:

麵粉 200g

雞蛋 1隻半

餡部份:

豬肉 150g

芝士 150g

調味料 Basil, Oregano, Thyme 各半茶匙

鹽 半茶匙

茄汁部份:

蒜頭 兩粒

茄膏 半罐

茄粒 適量(我用左一罐)

水 300ml

鹽 半茶匙

調味料 Basil, Oregano, Thyme 各半茶匙

Bay Leave 兩塊

步驟:

睇落好煩? 其實只要清楚自己要做咩, 一切可以好快手, 分分鐘快過我整個大阪燒!

 1) 豬肉餡同調味料混合先, 芝士唔需要調味的關係, 到包雲吞的時候先加入都可以

2) 麵粉同雞混合, 因為每個人用的麵粉都不盡相同, 雞強的size都有分別, 所以我的建議係, 慢慢落蛋漿, 先落一半, 搓好, 尚有乾紋的話就再逐少加入, 最後搓到粉糰光滑不沾手就可以

3) 如果好似我咁, 屋企有壓麵機, 就用壓麵機過粉糰, 記得一路過要加番麵粉避免佢痴住
如果無, 用棍壓開佢至薄皮, 每次壓完就用刀仔CUT邊控制Size再壓

4) 然後就可以用餃子的模去包, 中間放的餡料量豐儉由人

ps, 記得面頭要落少少麵粉, 避免互相痴埋一齊

5) 蒜蓉開鑊, 落茄膏, 茄粒同水混合煮滾

6) 然後就可以加雲吞落去, 盡量令醬汁完全蓋過雲吞的面, 讓雲吞可以充分熟透, 同時可以將調味料加入, 特別係Bay Leave呢類要時間出味的香草, 加完後就可以閂蓋, 轉中小火焗10分鐘

7) 因為本身雲吞表面就有麵粉, 只要醬汁收到乾身就會自然變濃稠, 但如果無, 就自行落生粉水打獻就可以!

本來意大利雲吞就係好隨意的食物, 餡料自由轉換, 而外面的醬料都可以因應喜好而改變, 例如係菠菜芝士雲吞配白汁, 墨魚汁配巴馬臣芝士又得, 覺得芝士肥? 我聽過冬菇雲耳餡配蠔油汁

好古怪吧? 但煮食就係可以因應口味同個人習慣而變化, 就算唔係精英, 只要按照食譜, 人人都可以係食神.......

唔...話有點說大了, 我都係乖乖地收皮啦

btw, 傳統的Tortellini應該係要將兩邊的角折起, 變成一個細的耳仔形狀, 不過時間關係, 隨意就好了!